حوار طرشان /كامل النصيرات
حوار طرشان
كامل النصيرات
حوار بين أطرشين ؛ واحد هادئ وواحد عصبيّ :
الأطرش الهادئ : الأمور رايحة لحرب ..الأجواء متوترة و لن تهدأ بين أمريكا وإيران وستتوسع رقعة الحرب.
الأطرش العصبي : موسم البطيخ انتهى ..وزوجتي تتوحّم ..وشو بده يقنعها أن البطيخ الموجود مش زاكي ومهرمن ومش أحمر ولا حلو.
الأطرش الهادئ : بالك يا صاحبي لو اتوسعت رقعة الحرب مثل ما بيحكوا ؛ إحنا رح نتطرطش منها أو يمكن ندخل فيها ؟؟
الأطرش العصبي : والله ما رح اشتريلها بطيخ وإذا لوت بوزها لألعن تاريخ تاريخها ..هي شو بتفكرني ؟ لا لا ..لازم أورجيها العين الحمرا.
الأطرش الهادئ : حرب يعني موت بالآلاف..مصابين ..أسرى ..بيوت رح تنهدم ..هجرات ..نازحين..فقراء جدد..حرام هيك..
الأطرش العصبي : آه والله ..زوَّدَتها بالفعل..بطيخ وهسّا ؟ هسّا بتطلب بطيخ وإذا سايرتها بكرة بالصيف بشهر سبعة بتطلب مندلينا ..والله لألعن اللي نفض اللي نفضها ..( وخبط يده على الطاولة غضباً)..
الأطرش الهادئ : وحّدْ الله يا زلمة اهدا..أنا بحكي يمكن يصير هيك ومش أكيد ..يمكن ما تصير حرب وتدخل واسطات وتنتهي الأمور..بالله عليك تهدا..
الأطرش العصبي : لازم أحطلها حدّ لازم ..هيك ما بينفع ..ولازم تفكّر معي يا صاحبي..شو أعمل؟
الأطرش الهادئ : اسمع ..بما انك هديت شوية ..ومن باب الاحتياط لأي شي..شو رأيك نفكّر بالهجرة ونروح نجهز حالنا من الآن ؟
الأطرش العصبي : شو رأيك أروح أحط فيها بدن وأكسّرها وأخلّيها تبطّل هالحركات ؟
الأطرش الهادئ ( وهو يقف) : شو قلت ..نروح نجهز حالنا للهجرة ؟
الأطرش العصبي ( وهو يقف) : معناتو أروح هسّا ع البيت قبل ما ييجي حدا من أهلها ..
الأطرش الهادئ : اسمع ..خلينا نلتقي المسا نشوف ترتيباتنا ..يلا باي
الأطرش العصبي : ممتاز ..وانت كمان حطلها حد ..نسوان آخر زمن ..