يوميات سالم ح 26 / أكرم الزعبي

يفتح سالم الراديو ويستمع مع رفيقه لأحد البرامج الدينية على إحدى القنوات :
(السلام عليكم سيدنا الشيخ) (وعليكم السلام ورحمة الله، أهلا يا بنتي، تفضلي شو سؤالك؟؟) (سيدي الشيخ انا الطبيب وصفلي قطرة للانف 3 مرات باليوم لأنه عندي جيوب، قطرة الأنف بتفطّر برمضان ولّا لأ؟) (طيّب يا بنتي، تستمعين للإجابة إن شاء الله، معنا متصل آخر، الو السلام عليكم…..)

– نفس السؤال اللي بتكرر من ألف سنة، ياخي يا سالم متى بدنا نخلص من هالاسئلة اللي بتنعاد كل سنة برمضان، قطرة العين بتفطّر؟ البخاخ بفطّر؟ ياخي الناس ما زهقت من هالاسئلة؟؟.
– ولا عمرها بتزهق، بس بتعرف؟؟
– شو؟؟
– السنة لاحظت إنه بعض الشيوخ حلّلوا البخاخ باعتباره دوا.
– ما علينا، دوا ولّا مش دوا، قطرة الأذن بتفطّر ولّا لأ مولانا الشيخ سالم؟؟

يضحكان معًا، بينما سالم يقلّب المحطات ويستقر أخيرًا على محطة إخبارية :

(….. هذا وقد قامت فرق الاستقصاء الوبائي بأخذ خمسة آلاف عيّنة عشوائية ضمن البرنامج الوطني لمكافحة الفيروس المستجد كورونا كوفيد ناينتيين، وأكّد رئيس اللجنة الدكتور……).

– شوفتك أبو السُلُم بنخلص من كورونا السنة؟؟
– بنخلص إذا الله أحيانا، اسمع، حط الكمامة قدّامنا دورية (يقول سالم وهو يطفئ الراديو ويضع الكمامة على وجهة، ثم يزيلها بعد أن يتجاوزا الدورية).

– هدّي يا سالم هدّي، مالك طاير؟؟
– بدّي ألحق الإشارة قبل ما تسكّر.

يقطع سالم الإشارة الضوئية بعد ثانية من تحوّلها للّون الأحمر.

– يا زلمه الك ساعة بتحكي عن الإلتزام والأخلاق وبالآخر بتقطع الإشارة حمرا؟؟ يا رجل الحمدلله اللي ما عملنا حادث.
– يا زلمه شعور رائع تقطع الإشارة حمرا، بتحس حالك ضحكت على الحكومة و وفّرت على حالك خمسمية ليرة مخالفة الإشارة.
– يعني لو فيه كاميرا ع الإشارة بتقطعها حمرا؟؟
– طبعًا لأ، بوقّف مثل الأرنب.
#بعدين_مع_سالم