43
كنانة نيوز –
قاري الفنجان
رائــــد عبدالرحمن حجازي
بما أنه الشغل داقر هاليومين بسبب القوانين اللي معاكو خبرها ، ومن باب التغيير قررت أفتح بالفنجان ويا ريتني ما فتحت .
هاظ يا طويلين العمر ويا حفيظين السلامة طلع لي بالفنجان بني أدمين كثار منهم إشي بركظ ورا رغيف الخبز وإشي معاه قزازة توسفين فاظية وإشي شايل جريكن كاز فاظي وإشي ريقه يابس مثل الحطبة . كله هاظا كوم واللي شايل جرة الغاز باصبعه الوسطاني كوم ثاني .
المهم بالموضوع ومن باب الحلال والحرام سألت أحد الفقهاء عن حرمة الفتح بالفنجان فأجابني بتأكيد حُرمة ذلك فقلت له : بس يا سيدنا الشيخ فنجاني ما في طريق طويلة ولقايا ورصد وغيره وغيراته أني كل اللي طلعن معي رغيف خبز وقزازة دوا وجريكن كاز ! فقال لي : ولو كان يا ولدي المهم إنك ما تفتح . فقلت له : طيب خلص بوعدك إني ما أفتح إشي من هون ودز ، حتى قزازة الكازوز مش رح أقرب عليها .
ملاحظة : تم كسر الفنجان لضمان عدم اللجوء للشكاوي الكيدية أما الصحن فقد عاد لمكانه الطبيعي بين زبادي الصلطة وترى أني بعرف الفرق بين (ض) وال (ظ) لكن بديش أجرجرهم عالمحاكم .