يوميات سالم
الجزء الثالت /ح 7
أكرم الزعبي
– يا اخوان الموضوع بسيط، وأحل الله البيع وحرم الربا، ما بدها مفتي ولا روحة ع القاضي.
يقول سالم أثناء نقاش حاد مع أصدقائه هاني وخالد.
– بالله تعرّفلي البيع والربا يا سالم!! يقول هاني الذي يعمل مديرا لأحد فروع البنوك ( الربوية على رأي سالم).
– البيع تشتري وتبيع وتربح مثل ما بدك، الربا قرضة مصاري وتسدها بزيادة، ان شالله بتزيد ليرة ع الدين.
– سالم وحد الله (يقول خالد، ويضيف) ربنا بقول لا تأكلوا الربا أضعافًا مضاعفة، يعني شرط الربا هو التضعيف.
يضحك سالم ويقول :
– والله هاي فتوى جديدة ما حكى فيها لا السابقين ولا اللاحقين، هو بالله لا تفتي على كيفك ياااا “شيخ خالد”.
– يا زلمه شغّل هالبطيخة اللي على راسك، ربنا اعطاك مخ تفكر فيه، يقول خالد.
– يا حبيبي المثل بقول “ارميها برقبة عالم واطلع سالم” يقول سالم.
يضحك هاني بصوتٍ عالٍ ويقول :
– خلص يا خالد ارميها برقبة سالم.
– يا اخوان أنا بحكي جد، ما دام علماءنا بحكوا إنه أي زيادة ع المصاري ربا معناها ربا، يقول سالم ويكمل لعن الربا وآكله وشاهده و…
يقاطعه هاني ويقول :
– على حساباتك هاي أنا شغلي حرام.
– طبعاً، هل عندك شك؟؟ يقول سالم.
– عندي شك وكمبيالة، يقول هاني ويضحك.
– حبيبنا سالم لو بدك تشتري سيارة من أي بنك إسلامي بياخدوا منك ربح (طبعاً هو فائدة) 7٪ ولو تيجي ثاني شهر تسدهم رح تدفع المبلغ مع أرباحه” فوائده” كاملة، يعني ما بتفرق تسد على خمس سنين أو كاش (قال خالد، وأضاف)، أما البنوك الثانية لو تيجي تسد بعد شهر بتدفع فائدة الشهر بس، ولعلمك تعريفك للبيع والربا خاطئ.
– نورنا بعلمك سيدنا الشيخ، قال سالم باستهزاء
– البيع يحتمل الربح والخسارة، أما الربا ما فيه، ربح فقط.
يتدخل هاني ويقول :
– على هيك البنوك اللي بحكي عنها سالم ربوية بتطلع بنوك إسلامية أكثر من البنوك إللي إسمها إسلامية.
– يا حبيبي ع الفلسفة اللي بلا طعم، يخوي انت واياه هذا دين مش تين، وانتو مش مختصين بالدين، العلماء أجمعوا إنه البنوك الإسلامية حلال والباقي حرام، سكروا ع الموضوع.
……….
بعد اسبوع
………
يدخل سالم على هاني في مكتبه في البنك، وبعد السلام والاحترام، يطلب هاني فنجان قهوة سادة لسالم، ويسأله :
– شو هالزيارة المفاجئة حبيب؟؟
– اسمع ابو العبد، بدي همتك معي يخوي، يقول سالم.
– ابشر باللي أقدر عليه.
– بدي قرض بـ عشر آلاف لشهرين بس، بدي أشتري سيارة.
يفتح هاني عيناه على وسعهما، ويضع يده على خده، وبعد “صفنة” تجاوزت نصف دقيقة كان خلالها وجه سالم “بالألوان” يقول :
– وك انت بدك تفصمني يا رجل؟؟ قبل اسبوع هلكت عرضي بالحلال والحرام، شو اللي غيّر؟؟.
– يزم رحت على بنك إسلامي حكولي أشوف سيارة بعشر آلاف وهم بدفعوا حقها، ورح يبيعوني اياها أقساط على خمس سنين، مقابل ربح أكثر من 3 آلاف ليرة، حكيتلهم جايني حوالة بعد شهرين ورح اسدد المبلغ كامل، حكولي الربح ثابت، ولما حسبتها على طريقتكو لقيت انكو بعد شهرين يا دوب تحسبوا علي ثلثمية ليرة أرباح، يعني من عندكوا بوفر على حالي أكثر من ثلتالاف ليرة.
يضحك هاني بشكل هستيري ويكاد يقع من كرسيه وهو يقول
– رح أمشيلك القرض، لكن وشرف عرضي إذا بتحكي بالحلال والحرام مرة ثانية إلا افضحك.
#بعدين_مع_سالم