يوميات سالم
ج ٣، ح ٦ (معادة)
أكرم الزعبي
يمشي سالم في بيته ذهابا وايابا وعلامات الانزعاج تبدو على وجهه.
– يا زلمة حَوَلت أهلي، مالك رايح جاي مثل (لِقْرُقّه)*.!
تقول زوجته.
– يا مره قرفت، مليّت، روحي فرفطت، فوق الحظر كورونا، وما معي مصاري، ما انتي شايفة الثلاجة فاضية واذا ما اشتغلت ما أكلت.
– يا زلمه اقعد واهدا، كل البلد محظورة، بعدين الله يسعدها الحكومة ما قصّرت، قايمة بأكثر من واجبها مشان تحميك وتحمي اشكالك من الخطر.
– ما اختلفنا، بس من وين بدنا نجيب مصاري، وكيييييف بدنا نوكل؟؟
– اولاد الحلال كثار، قبل شوي حكى معي واحد ابن حلال وقال إنه حاسب حسابنا بطرد.
– هلا هلأ، ومين هالواحد إن شاء الله؟؟
– المحسنين كثار بهالبلد؟
– أنا ما بدي صدقة من حدا، واجب الحكومة تأمّني بكل حاجاتي الأساسية.
– الحكومة ع شو ولّا شو بدها تلحّق، الله يكون بعونها يا زلمه.
– ست تآلاف وردة وحفل زفاف وإقامة بفنادق خمس نجوم لست تآلاف إنسان، معظمهم مش محتاج، هذول يا حِزرك قديش كلّفوا الحكومة؟
– يا زلمه لا تخلّي عينك ضيقة، وين بدهم يروحوا فيهم يعني؟؟
– أيواااا، في ألف مكان أرخص وأوفر، وفي عشرطعشر ألف بني آدم مثل حكايتنا مش لاقيين يوكلوا، فَرق المصاري بتوزّع ع اللي مثلنا.
– والله يا سالم مانت لاقيلك شغلة، إنت بس بدك تطخ ع الحكومة، يا زلمة ما شفت العالم كيف بتتبرع للحكومة؟ يا زلمه حتى نقابة المعلمين تبرعت بنص مليون دينار.
– شفتي كيف بتناقضي بحالك؟ يعني الحكومة توخذ تبرعات واحنا نموت من الجوع، لو النقابة اشترت مواد غذائية و وزعتها على الناس أحسن ما تتبرع فيهن ويروحن فاتورة ورد وفنادق.
– وبعدين معك يا زلمه، الحكومة بتوخذ تبرعات لأنه الكارونا بتخوّف، وبدها مصاري مشان تقدر تحميك وتحمي البلد،
– ولِك يا مَره مش مختلفين، بس بصيرش الواحد مرّة يبعزق ومرّة يشحد.
– بتعرف يا سالم، الحمدلله إنه في حظر لانه لو تطلع لبرا وتحكي هالحكي عليم الله غير تنحبس سنتين.
يضحك سالم بصوتٍ عال، ثم يقول :
– والله فكرة، منّه أنا ماكل شارب نايم، ومنّه بطلعلِك ميّة وخمسين ليرة من التنمية الإجتماعية.
تضحك زوجته معه، وأثناء ذلك يسمعان صوت جرس الباب.
يفتح سالم الباب فلا يجد أحدا، ولكنّه يرى صندوقا مليئا بمواد تموينية أساسية، يحمله ويدخل البيت، ثم يتناول هاتفه ويكتب على صفحته في الفيس :
(الحكومة الله يعطيها العافية مش مقصرة، ملتزم بالبقاء في البيت، وبانتظار أخبار طيّبة من حبيب الشعب وزير الصحة، الله يسعد دينه).
#بعدين_مع_سالم
* (لِقْرُقّه) : الدجاجة التي تجلس على البيض 21 يوماً لغايات التفقيس.
يوميات سالم 3 / أكرم الزعبي
14