حكايات الحنين .. سلسلة طويلة من الحكايات الشعبية/ بقلم يوسف عبيدات
بقلم يوسف عبيدات
ولك ناولني هالوطيه يابا، هظاك هي مدحوشه تحت المعشوقه بالحقيبه قيت اربد، بعدها ع حطت ايدي من يوم جبتها من عند الكندرجي قبل أسبوعين… اما وشووو حطلها نص نعل ودرزها داير مايدور وإعطاها وجه بويا… يا عونة الله…. عز الله اني توهت عنها يوم رجعت عنده مشان اخذها….. وشوفتها وأنها تقول جديده طخ….. لكن الخايس كسر ظهري عند الحساب…. وحياة راس ابوه غير قرشين ونص… وما رضي يتزحزح ولا تعريفه… يعني أُخرى قطومه حق وطيه جديده….. لكن بستاهل يعني وشو بتفرق عن الجديده. اي عفيه ابوي عفيه… الله يرضى عليك ولو بيها شوية غلبه عليك تناولني هالمزنوك هاظ هو ممدود تحت الطراحه من امبارح عقب ما غسلته امك وحطته مشان يتمسّد وتروح الطعوجات منه.
اي هه.. هذا الصحيح.
وهسع بلبس الشوره وبحط العباه على إكتافي وبشخّص، وبروح عالعطوه واني معرّش وبدي اقعد بجنب الباشا وبس يفوت اني بضل ملزق وراه على طول وما بخلي حدا يفوت بيني وبينه تامني اضمن قعدتي جنبه.. وبس يحطوا فنجان الجاهه قدام الباشا ويوافقوا ويقولوا صبوا القهوه.. بشرب اني اول واحد بعد الباشا.
وإجعص عاد من عقبها ياعقله chان فيك تجعص.
وبس يكتبوا الصك اول واحد بمضي عقب الباشا اني…….. ايوااااااا بس اني مابعرفش أمضي.. غير بصمه… منين اجتني هاي قلة الكتابه…. وإلا اقولك ماهو ماحدا قاري خط… خلص بخرطشلي خرطوشتين وصلى الله وبارك.
طيب ماهو بدهم يودوا الورقه لمدير الناحيه.. وشلون هاظ المهدوم مدير الناحيه بده يعرف انه هاظ اني الي مخطرش هون.
الله يا قلة البخت شلون بدي احلها هاي ياربي… بدي اصير وأقبّ ع وجه الدنيا واشوف حالي بني آدم عليه القيمه. طيب بس يمضي الباشا وقبل يناولني الورقه بقوله خلص أمضي عني.
لا لا مش معقوله والله خوف الله لو اصير مساويها غير يعدمني بموضعي هاظ إذا ما تناولني بقفا ايده قدام الحاضرين… لا لا ياعقله دير بالك هاي الجاهات والعطوات والصلحات ترى الغلطه بيها بكفره.. خلص بخرطش وعود يوم بتروح لمدير الناحيه مش رايح يعرف لمين الخرطيشيه وبسأل… اكيد الحاضرين بقولوله هاي إمضت عقله…… اخ اخ اخ شو هاظ……. يا عيب العيب واقعه زهرة السكاره عالمزنوك واحرقته يا فضيحة الفضيحة الله يقطعك ويقطع حظك ياعقله ..عاد عُقب ما دوزنتها وضبطت معي شغلة القعده.. والإمضا .. خلص انتزع الطابق أبيش نصيب بالروحه كلها……. ياحوينة هالقرشين ونص الي حطيناهن عالوطيه .. المقرود مقرود ياعمي لويش الحجي .