يوميات سالم ح 22 / أكرم الزعبي

أبو محمد وسالم في نهاية الخمسينات من عمرهما، ترافقا سويًا في المدرسة والعمل، وبعد التقاعد افتتح كل واحدٍ منهما مشروعه الخاص.

يمد سالم يده ويطفئ الراديو :
– يا زلمه أخبارهم بتسم البدن، بضحكوا علينا بالكورونا، كل القصة الصين بدها تبيع أجهزة طبية وكمامات وتلم قروش العالم.
– أي هو على كيفك؟ لو كلامك صحيح أميركا ما بتسكت، يا زلمه صار ميّت عندهم ميتين وخمسين ألف واحد.
– مش من الكورونا حبيبي، هذول أصلًا مناعتهم ضعيفة، واللي مناعته ضعيفة بفطرز بكورونا وغيرها.
– هالّله هالّله ع الخبير الصحي الاستراتيجي، يخوي شو رايك احجزلك فقرة ببرنامج فيصل القاسم؟
– بتتخوث ها؟
– آه بتخوث، والله ما ظل غير تقولّي إنه الفيروس قبل ما يصيب الواحد بسأله مناعتك قوية ولّا ضعيفة؟؟.
– آه بِسأله.
يضحك أبو محمد ضحكة طويلة ويقول :
– لو ظلّينا ع الراديو ارحملنا.
– طيّب انتبه انتبه للمطب اللي قدّامنا (يقول سالم) وك يا بهيم المناعة القوية جدار حديدي ضد أي مرض أو فيروس، وبتعرف شلون تخلّي مناعتك قوية؟؟
– شلون ياااااا فطحل زمانك؟؟
– بتعمل مثلي، أنا ما بوكل إلا الأكل الصحي الأصلي، السمنة البلدية الأصلية، الزبدة الأصلية، العسل البلدي الأصلي، البيض البلدي، يزم حتى الخضرة بزرعها قدّام البيت، آآآآآآخ على ريحة الخيار يا ابو محمد، اشي بفرفح القلب، مش مثل الخيار ولّا الخضرة اللي بالسوق اللي ما إلها طعم ولا ريحة.
– قد ما بحطوا فيها هرمونات، كل أكلنا مهرمن يا سالم، وبتقولّي مناعة وبتقولّي ليش البلد كلها سرطانات وجلطات؟؟

يبلع سالم ريقه، ويداري احمرار وجهه بالقول :
– بِعِين الله أبو محمد، خلص نزلني هون عند هذا المحل وروح كمّل شغلك، ولمّا تكمّل رن علي.
– لويش يا زلمه، بنزل معك، بتشتري حاجتك وبترُوح معي.
– لا، لا، لا، أني احتمال اتأخر واني بستنى بالدكتور البيطري لأنه بالعادة بيجي ع الوحدة ونص والساعة بعدها وحدة، ما بيجي إلا اني مشتري اغراضي ومكمّل مع الدكتور.
– زي ما بدّك، لمّا اخلّص برن عليك.
– على بركة الله (قال سالم وهو ينزل من البك أب).

يدخل سالم محل المستلزمات البيطرية، وبعد السلام يقول للموظف :
– يخوي عندي مزرعة جاج فيها خمس تالاف طير، وبدي الهن هرمون نمو، قديش بحتاجن؟؟
– بدهن عشرة لترة.
– طيّب يخوي بدّي اياهن، بس مشان ما انفضح مع رفيقي ابو محمد بدّي تشيل الورقة اللي ع الجَلن وتكتب بدالها (محلول مائي ضد الإسهال خاص بالدواجن) لأنه الزلمة انجليزياته ممتازة، واذا عِرِف بِشِل عرضي.
#بعدين_مع_سالم