يوميات سالم
الجزء الثالث – الحلقة ١٤
أكرم الزعبي
– يابا عاجبك حالي؟؟ يقول سالم.
– خير يابا، ماله حالك!! الحمدلله شغلك تمام وراتبك ممتاز، وهيّاتك ماكل شارب نايم ببلاش، مش ناقصك اشي.
– كيف مش ناقصه يا ابو سالم؟؟ الولد صار عمره سبعه وعشرين سنة ولازم يتجوز. (قالت الأم)
– والمطلوب؟؟
– بدنا نشوفله بنت حلال، إذا اتجوز راتبه ما بكفيه إيجار ومصروف بيت، و الخطبة والزواج بدها مش أقل من عشر تالاف ليرة.
– والله يا ام سالم إذا بتفكريني قاعد على بنك بتكوني غلطانة، أي هو التقاعد يا دوب يكفينا أكل وشرب، يدبّر راسه، أنا تزوجتك بعمره وما ساعدني لا أبوي ولا عمي.
– يا زلمه إنت مفكر أيامنا مثل أيامهم، إذا مهري المتأخر حسرة علي ميتين ليرة، بنات اليوم متأخر أقل وحدة فيهن سبع تالاف.
– دشريني من هالاسطوانة البايخة، أنا زلمة معيش مصاري.
يتدخل سالم ويقول :
– الأمور محلولة وسهلة يابا.
– شلون محلولة يا حبيب امك.
– اختي سعاد ما بتعطيكوا من راتبها فرنك، بنوخذ قرض على اسمها من البنك مشان يغطي مصاريف العرس.
– شوووووو، ولا يمكن اقبل، راتبها حقها، وحرام نقرّب عليه، نسيت إنها مخطوبه وعرسها بعد شهرين؟؟
– لا يابا ما نسيت ، بس انت اللي ربيت وقرّيت ودفعت دم قلبك عليها، ولما صارت تنتج بده يروح خيرها للغريب؟؟ ، لا يابا إحنا أولى براتبها، بكفّي إحنا معطين خطيبها أربعه وعشرين ضلع مربّيه أحسن ترباية.
– والله كلام سالم بمكانه يا ابو سالم (تقول الأم).
– دبروا حالكو معاها، أنا خلوني بعيد عن الموضوع (قال الأب).
……………………………
تتولّى أم سالم إقناع ابنتها ويحصل سالم على القرض ويتزوج موظفة بعد ثلاثة شهور.
في اليوم الخامس من الزواج :
……………………………
– صباح الخير يا عمري.
– صباح الورد سلّومتي.
– اليوم نزلت الرواتب، وحتى ما تتغلبي اعطيني بطاقة الصراف والرقم السري أسحب راتبك.
– آه والله إني تعبانة حبيبي، هيّاتهم بالشنتة الحمرا، البطاقة والرقم السرّي.
يأخذ سالم البطاقة والرقم السري ويخرج، ثم يعود بعد ساعتين.
تننظر عروسه أن يعطيها راتبها، لكن سالم مشغول بهاتفه.
بعد أكثر من ثلاث ساعات تتجرأ العروس :
– حبيبي؟؟
– خير؟؟
– سحبت راتبي؟؟
– آه (يقولها بعصبية ونزق)
– ط ط ط طيب غريب ما اعطيتني اياه ولّا رجّعت البطاقة.
كانت هذه الكلمات كافية ليقفز سالم من مكانه صارخًا :
– شو حبيبتي؟؟، إحنا حال واحد، شو راتبي وشو راتبك، هو أنا معطيهن لمرتي الثانية؟؟
تزداد نبرة صوت سالم حِدّةً و يواصل :
– هو أهلك ما علّموكِ ولا حكولك إنه الوحدة بس تتزوج بتصير هي وراتبها لجوزها؟؟
– مش قصدي حبيبي مش قصدي، أنا آسفة والله أنا آسفة، اهدا يا عمري اهدا، خلص خلص حقك علي، اعمل اللي بدك اياه بس ما تزعل مشان الله.
يبتسم سالم في سرّه ويقول لنفسه :
– أيوا هيك يا سالم، إقطع راس القط من أول صيحة.
#بعدين_مع_سالم
يوميات سالم ح14 / أكرم الزعبي
7