بتعرفوا شو يعني القهر ؟ / محمد عارف مشّة

بتعرفوا شو يعني القهر ؟ 

محمد عارف مشّة

بتعرفوا القهر لمّا الطفل يروح لمدرسته مشي على الأقدام بعز البرد والصقيع والمطر نازل زخ على راسه بدون جاكيت ،وكيف دمعة القهر في عين الأب اللي مش قادر يوفر لأبنه أو بنته جاكيت ؟
ــ بتعرفوا القهر بعين الشب أو البنت اللي كمل دراسته الجامعية ومش لاقي شغل ، وإذا وجد شغل براتب 300 دينار في الحد الأعلى والقهر بعين الأب اللي مش قادر يصرف على ابنه الجامعي سواء الإبن ما بيشتغل أو بيشتغل براتب ما بيكفي الأبن مواصلات وأكل بشغله وباقي المصاريف على حساب الأب ؟
ــ بتعرفوا القهر لمّا الأب تتراكم عليه فواتير الكهرباء والماء وتيجي شركة الكهرباء تفصل التيار الكهربائي والأب ما قادر يدفع الفواتير لإضاءة بيت بلمبتي وفي أحسن الأحوال صوبة كهرباء فيها شمعة واحدة ؟
ـ بتعرفوا القهر لمّا أسرة أب تموت اختناقا من صوبة قديمة تسرّب الكاز والغاز ؟
ــ بتعرفوا القهر لما أب ينتحر أبنه لأنه البلدية عاقبته لأنه يبحث عن عمل شريف ولا يريد أن يسرق أو يحتال فتسرقه البلدية ؟ عرفتوا كيف القهر بعيون الطفل ابن المنتحر وحزن الأم ؟
ــ بتعرفوا القهر لما الأب ما يتمكن من دفع أجرة البيت ويلقى هو وأولاده في الشارع لأنه لا يتمكن من دفع الأجرة لأن راتبه أصلا لا يكفيه لليوم العاشر من الشهر بلا دفع أجرة أو فواتير
ـــ بتعرفوا القهر لما كاتب ومثقف مبدع يقف أمام جمع من الحضور وأمام وزير الثقافة يعلن أنه كما غيره كثيرون لا يمتلكون أجرة الطريق ، هذا الكاتب المثقف وغيره الكثير المفترض أن يدافعوا عن الوطن أمام صفقة القرن ، بتعرفوا شو يعني حجم القهر لمثل هؤلاء المثقفين المدافعين عن الوطن .؟
ــ بتعرفوا كم حجم القهر وأنا أكتب باللهجة المحكية عن شرائح من المجتمع الأردني ؟ وقد أكون أنا وعدد كبير من هذه الشرائح ؟
ــــ بتعرفوا ياوزراء حكومة النهضة ونوّاب حكومة النهضة شو يغني القهر ؟