حكايات الحنين .. الغلا يا الربع/ يوسف عبيدات

حكايات الحنين .. الغلا يا الربع/ يوسف عبيدات
الغلا يا الربع اشي مش طبيعي حيشاة الله من هالطاري اني اليوم لولا قطومه غير ارجع من اربد عالقريه بلا عقل.
طيرنا البيدر وضبينا المونه بالكواير وقلت خليني أسري سروه ع اربد بسد العميل قبل ما يطيرن القرشينات. وبجيبلي شوية أغراض للدار.
والله وصلت عند العميل… وشووو سلام الحباب  لا صاروا غياب. قعدنا شربنا كباية شاي ولفيتلي سكاره… أما شوو عنده تتنات جايبهن جديد……اشي غير شكل…..بنفوّت سولافه بسولافه……. المهم من عقبها قلتله خيوه طول هالتفتر وشوفلي حسابك
قال:_ لويش مستعجل… علواه الي عليك ثلاث ورقات
قلت:_ فال الله ولا فالك يا رجل.
والله قول… طال هالتفتر وصار يحسب وأخذ والله حُصه واهيه وهو يحسّب.. لفيت حيويلا اربع خمس سكارات من تتناته…قلتلك عنهن…… وهو بعده يحسّب……
قول خلّص وياريت ما خلص
وأنه بقول حسابك يا حفيظ العمر والسلامه نيره وخمسه وستين قرش
قلت وحد الله ياابو  سالم خاف من الله يا رجل والله لو اني كل يوم باجي ماصار حسابي هالقد….. وين ووين يالله بالشهر مره
قال:_ خيوه انت صادق بس نسيت انك من بيدر العام وانت تسحب ولا تنسى انك هبّيج ما بترحمش حالك يوم انك بتيجي.
قلتله خيوه فنطلي اياهن
قال حاضر…. وصار يفنطهن وأنه ما بيش اشي الي تقول محرز كلهن شماميط فتله وقزازة بنوره وشلوين يا ثلاثه عجوه وثوب للحرمه وسلك احمر وتتنات والباقي قهوه وسكر وشاي وبهار .. وزيت عَمله. عن قول والله شوية ناشد وراحه ومخشرم شغل عيديات للبنات بالأعياد.
المهم طرقت خضرا بزرها.. وقلتله كافيك هاي السنه.. والخمسه وستين قرش لبيدر الجايه. لأني السنه ناوي اخفف الهبج.. مشان ع خير اقدر الجايه اسدك .. الشغله صار بدها ديرة بال. قوم هسعيات حطلي شوية أغراض وقيدهن.
شو رايك عاد يافياض مش اشي بجنن
×فياض…… أي والله لو اني موضعك غير اتوفى.. الله أكبر نيره وخمسه وستين قرش بسنه وحده…. أي والله لو انك مجهّز ما وصلن هالقد… خفف خيوه من الهبج .. انت ضمنان موسم الجايه ييجي مثل السنه هاي الأرزاق علمها عند الله ومش كل مره بتسلم الجره