حكايات الحنين / بقلم يوسف غالب عبيدات
حكايات الحنين / بقلم يوسف غالب عبيدات
سياسه مفروضه……..أم…….. عاده موروثه …….
هو يابا ياحبيبي غد أُخذ هالفدان وروح لحالك قطّع بالأول الجزو كل معناه لحال وبعدين بتحرث معناه معناه أهون عليك من انك تمشي بالجزو كله تلم واحد.
أنيّ بدي مشان تتعلم وتصير حراث تعتمد ع حالك.. غد بموت ما بدك تعرف تدبر حالك وتشبع الخبز.
الولد.. يابا أني ما بحبش الحراث ولا بطيقه…… هو إذا أنت حراث أني لازم اطلع حراث اني بدي اقرأ واصير معلم.
الختيار.. هلا هلا.. أول الرقص حنجله بطلنا نعبي عيون قواريطنا.. تعالي اسمعي ابنك النضوه يا زريفه.. بضرب عليوي.. ومستحي بكار ابوه وجده.
شو هالخلفه الناكته هاي.
ولك لِدّ حوليك وشوف ماهو كل من بربى على ذيل والده.
والي بتطلّع لفوق بتنكسر رقبته وبموت من الجوع….. شو قولك بزكريا ابن فلاح الإستشافي صلاة النبي عليه هظاك النهار روحت عليهم صلحت الوطيه قام حطلها نص نعل ودرزها عالداير.. وشووو….. إشي فرجه.. اشطر من ابوه الف مره.
ليش نبعدها ونقربها.. انت مش هذيك اليوم روحت تحلق.. ويوم ما لقيت بالمحل غير ابو اسماعيل رجعت وقلت برجع مره ثانيه لما يكون إسماعيل بالمحل.. مش لأنه إسماعيل اشطر من ابوه.
وإلا امك.. بدها تنجد الفراش قالتلي.. قول لأبو سالم المنجد خليه يودي ابنه تيسير ينجد الفراش لأنه صلاة النبي ايديه بنلفن بحرير..اشطر من ابوه بكثير وهاظ غير أنه رِشق.
بسع بخلّص.
ولك حتى البنات يامهدوم الحيل……. هاي حليمه بنت مريم الخياطه . … صارن النسوان ييجنها من القرايا الثانيه على صيتها الي فقع……. وغيرهم وغيرهم كثير.. عندك حمدان…. ابن عطيه الّي بحذي الخيل لهلوبه صار….. حتى صاروا يحذوا خيل الحكومه عنده.
ياابوي امسح وجهك بالرحمن والمثل ما خلى إشي وما قاله….. الي ماهو كاره ياناره ..