حزب جديد طخ / رائـــد عبدالرحمن حجازي

كنانة نيوز –
حزب جديد طخ
رائـــد عبدالرحمن حجازي
في حوار مع أبو سلطان الدكنجي الذي استوقفني سائلاً عن موضوع تشكيل حزب خاص به حيث قال : خيوه بلا مواخذة ناوي أفتح لي حزب بدل سولافة هالدكانة وقرفها ، شو بتنصحني تا أفتح هالحزب
أنا : يا زلمة شو بدك بهالسولافة ! خليك ببيعك ومشتراك أحسن لك
أبو سلطان : بقولوا فيها شوية قروش وبصير الواحد يلبس له رثعة نظيفة وإن الله ارزقني بجوز اشتري سيارة مليحة بدال هالكُركيعية
أنا : في منه هالحكي لكن السولافة مش سهلة مثل ما أنت مفكر
أبو سلطان : ئي يعني حرام الواحد يلد لفوق ويصير ويتصور مثل باقي هالخلايق
أنا : لا يا سيدي أنت الخير والبركة لكن سولافة الأحزاب سولافة طرمة وفيها شروط بجوز أنت ما تقدر عليها
أبو سلطان : اسمعوا على هالحتشي قال ما بقدر عليها قال ، خيوه لا يروح مفكرني عالهبلات ترانى بعجبك وطول نهاري فاتح التلفزيون على الأخبار وبعدين دخلك وشّو هي هالشروط اللي بدها تعجزني ؟
أنا : أول بند لازم تجمع على الأقل الف واحد ويكونوا أعضاء بحزبك الجديد ولازم يكون من الألف على الأقلية ميتين شب وميتن صبية ولازم تجمع من ست محافظات مية وثمانين واحد يعني من كل محافظة ثلاثين على الأقل وغير عن هيك بدك تكون تفهم بالقوانين وفوتاتها وطلعاتها وتعيّن لجان وتوزّع عليهم المهام الخ ……
عندها أبو سلطان جحظت عيناه وفتح فاهه وأرخى ما أرخى وقال لي بنبرة أخف من سابقاتها وهو مندهشاً : بالله يا حبيبنا تفهمني هالسوالف بشكل أبسط تراك أني فهمي على قدي . فقلت له : ولا يهمك رح أفهمك اياها ببساطة وفي هذه الأثناء وقع نظري على كراتين البيض فقلت لأبو سلطان : لد عليّ هسه لو طلبت منك كرتونة بيض وقلت لك بدي فيها ست بيضات حُمر وشرط البيضات الحُمر يكونن بمحاحتين والبيضات الباقيات بدي تجمع لي اياهن من ست جاجات وكل جاجة من قرية وكمان بدي ربع الطبق يكون نصه بيض زغير والنص الثاني للربع يكون بيض كبير والثث ارباع الباقيات حجمهن وسط .
أبو سلطان وبعد أن عادت عيناه لتجويفهما وشد ما كان قد ارتخى منه قال لي مبتسماً : قولتك خليني بدكانتي أريح وجعة راس .